Baıqaý Kazakh Tourism, Týrızm jáne sport mınıstrligi men «Atameken» UKP qoldaýymen uıymdastyryldy. Onyń negizgi maqsaty - elimizdegi sý aıdyndarynda qyzmet kórsetýdiń jáne qaýipsizdik standarttaryn arttyrý.
Bıyl saraptamalyq komıssııanyń nazaryna óńirlerden 30 astam jaǵajaı usynyldy. Onyń ishinde jekemenshik ári qalalyq jaǵajaılar da bar. Baǵalaý QR ST 3013-2017 ulttyq standartyna sáıkes júrgizildi ári halyqaralyq Blue Flag baǵdarlamasynyń jekelegen krıterııleri eskerildi.
Irikteý kezinde akvatorııanyń qaýipsizdigi, sanıtarlyq jaǵdaıy men ınfraqurylymy, qutqarýshylar men medısınalyq beketterdiń bolýy, jaǵalaýdyń yńǵaılylyǵy, aýmaqty josparlaý, sýdyń sapasyn turaqty túrde baqylaý jáne qoqysty bólek jınaý, kún energııasymen jumys isteıtin dýsh kabınalary, ekologııalyq bilim berý is-sharalaryn qamtıtyn ekologııalyq bastamalar esepke alyndy.
Saraptamalyq komıssııanyń baǵalaýy boıynsha TOP-3 úzdik jaǵajaı anyqtaldy. Olar jınaýǵa múmkin bolǵan 170 baldan tómendegideı nátıje kórsetti. I oryn – Wyndham Garden Beach (Aqmola oblysy, Býrabaı) –166 ball; II oryn – №5 qalalyq jaǵajaı (Almaty oblysy, Qonaev q.) – 145,5 ball; III oryn Ortalyq jaǵalaý (Pavlodar oblysy, Pavlodar q.) – 145 ball.
Úzdik jaǵajaılar taza ári qaýipsiz akvatorııasymen, damyǵan ınfraqurylymymen (kıim aýystyratyn bólmeler, dýsh kabınalary, demalys aımaqtary, dámhanalar) erekshelendi. Sondaı-aq balalarmen keletin otbasylarǵa qolaılyǵymen, tabıǵatty saqtaý maqsatyndaǵy ekologııalyq sheshimderdi jáne bastamalardy júzege asyrý jaǵy da eskerildi.
«Úzdik jaǵajaı» baǵdarlamasy – bul elimizdiń eń úzdik jaǵajaılaryn anyqtaý ǵana emes, sonymen qatar óńirlerdi ózderiniń demalys aımaqtaryn halyqaralyq standarttarǵa sáıkes damytýǵa yntalandyrý. Aqmola, Atyraý, Qostanaı, Qaraǵandy jáne Almaty oblystarynyń óńirlik kásipkerler palatalary men ákimdikterine belsendi áriptestik tanytyp, bizdiń bastamany qoldady», - dedi «Kazakh Tourism» UK» AQ basqarma tóraǵasynyń mindetin atqarýshy Danıel Serjanuly.
Endi «Úzdik jaǵajaı» baǵdarlamasy jyl saıyn uıymdastyrylmaq.
